Огромна победа за Трамп: Врховниот суд дозволи депортација на мигранти според стар воен закон

Поранешниот претседател Доналд Трамп доби голема правна победа – Врховниот суд на САД му дозволи да депортира мигранти користејќи го „Законот за туѓи непријатели“ од 1798 година, закон кој последно бил користен за време на Втората светска војна.

Со тесно мнозинство од 5-4, судот ја укина претходната забрана на федерален судија и ѝ даде зелено светло на администрацијата на Трамп да продолжи со депортација на осомничени членови на венецуелската банда „Трен де Арагуa“. Трамп ги прогласи за терористи, а минатиот месец неговиот советник за граници, Том Хоман, организираше масовни апсења низ цела Америка.

Судијата Џејмс Боасберг, назначен од Обама, првично го блокираше овој потег, велејќи дека законот од 18. век не важи освен ако САД не се во официјална војна или нападнати од друга земја. Но, Врховниот суд ја укина оваа забрана.

Трамп триумфално изјави: „ОДЛИЧЕН ДЕН ЗА ПРАВДАТА ВО АМЕРИКА!“, додавајќи дека „претседателот мора да може да ги штити семејствата и границите на нацијата“.

Министерката за правда Памела Бонди исто така ја поздрави одлуката како „историска победа за владеењето на правото“ и го обвини судијата Боасберг дека ги надминал своите овластувања.

Самиот закон овозможува депортација или притвор на странци во време на војна – нешто што обично се применувало против државјани на непријателски земји како Германија, Јапонија или Италија во минатото. Но, Трамп тврдеше дека бандата „Трен де Арагуa“ извршува „нередовна војна и непријателски акции“ против САД, со цел да ја дестабилизира државата.

Сепак, критичарите тврдат дека ова е злоупотреба на законот, кој бара постоење на воена состојба или директна закана. Адвокатите на приведените венецуелци предупредија дека некои од нив можат да завршат во затвори во Ел Салвадор, без судење, со доживотни последици.

Пример: еден од депортираните бил фудбалер и тренер, а американските власти го обвиниле дека е член на банда поради тетоважа со круна – симбол на Реал Мадрид.

Иако судот не се изјасни дали законот правилно е применет, одлучи дека правниот процес мора да се одвива во сојузната држава каде што мигрантите се притворени – во овој случај Тексас, а не Вашингтон.

Истовремено, судот нагласи дека депортацијата не смее да се извршува без претходна писмена најава, за мигрантите да имаат шанса да поднесат тужба.

Судиката Соња Сотомајор беше меѓу четворицата кои не се согласија со одлуката, велејќи дека судот „му даде вонредна моќ на претседателот без да го разгледа штетниот ефект по жртвите“.

Во меѓувреме, судијата Боасберг размислува дали да покрене постапка за непочитување на судот, бидејќи администрацијата на Трамп испрати авион со депортирани уште пред тој да ја издаде својата писмена наредба.