Ова паднало од Вселената право во едно село во Кенија

Во средата, селото Мукуку во Кенија доби неочекуван посетител од вселената.

Околу 15 часот по локално време, голем метален прстен, тежок околу 500 килограми и со дијаметар од 2,4 метри, се урна во селото, соопшти Кениската вселенска агенција. Од агенцијата истакнаа дека нема повредени и дека отпадот не претставува непосредна опасност.

Мајор Алоис Вере, офицер во Кениската вселенска агенција, изјави за Citizen TV, кениска телевизија, дека објектот е „веројатно дел од фаза на одделување на ракета“.

Сè уште не е јасно на која ракета ѝ припаѓа прстенот. Надлежните собираат делови од местото на падот за понатамошна анализа за да го утврдат потеклото.

Following the discovery of a metallic fragment of a space object in Mukuku Village, Makueni County, the Kenya Space Agency has issued the following statement. Read more for details on the incident, preliminary findings, and next steps. pic.twitter.com/n8gsvoKku4

— Kenya Space Agency (@SpaceAgencyKE) January 1, 2025

Вере додаде дека, откако ќе го идентификуваат сопственикот, вселенската агенција ќе ги искористи „постоечките правни механизми според меѓународното право“ за да бара одговорност.

Вселенскиот отпад обично е дизајниран да изгори во Земјината атмосфера пред да стигне до површината или да падне во непопуларани области, како океанот. Но, тоа не се случува секогаш.

На пример, во мај 2024 година, дел од ракета на SpaceX, голем како хауба од автомобил, се урна на патека во планински ресорт близу Ашевил, Северна Каролина.

„Ако тој ден паднеше врз некој планинар, сигурно ќе го убиеше,“ изјави астрофизичарот Џонатан МекДауел од Харвард и Смитсонијан Центарот за астрофизика, водечки експерт за вселенски отпад, за Business Insider во јули.

Досега, никој нема загинато од вселенски отпад кој паѓа на Земјата.

Можеби најблиската опасност се случи во март, кога дел тежок 900 грама, малку помал од лименка сода, падна од Меѓународната вселенска станица, пробивајќи го покривот на една куќа на семејство во Флорида. Семејството го тужи НАСА поради инцидентот.

Откако луѓето започнаа со лансирање објекти во вселената во доцните 1950-ти, постои ризик некои од нив да се вратат на Земјата на неочекувани места. Но, со зголемениот број лансирања, овој ризик расте.

Меѓу 2008 и 2017 година, глобалните вселенски организации лансирале просечно 82 орбитални ракети годишно.

Меѓу 2018 и 2022 година, бројот порасна на просечно 130 лансирања годишно, според Меѓународната трговска комисија на САД. Во 2024 година, биле извршени околу 250 лансирања – нов рекорд.

Ова претставува ризици за Земјата, но и додава на долготрајниот проблем во вселената: вселенски отпад и судири. Во вселената има огромна количина отпад – од стари сателити и ракавици од астронаути до ситни парчиња помали од зрно грозје.

Овие милиони делчиња отпад се движат околу нашата планета со брзина поголема од куршум. Проблемот е толку сериозен што дневно се издаваат околу 1.000 предупредувања за можни судири, изјави физичарот Томас Бергер на прес-конференција на годишниот состанок на Американската геофизичка унија во декември.

Бергер предупреди дека голем судир може да предизвика „неконтролирана ланчана реакција на нови судири, што би резултирало со целосно преполнета вселенска околина.“

Ако тоа се случи, вселената би станала неупотреблива.