Писмо старо 300 години, напишано од научникот Исак Њутн, предвидува дека светот ќе заврши и поскоро отколку што претпоставувавме

Писмо од 1704 година, напишано од славниот научник Исак Њутн, содржи предвидување за крајот на светот, а датумот што го навел е изненадувачки блиску. Познатиот математичар и физичар, кој го формулирал законот за гравитација, направил пресметки засновани на библиски текстови, предвидувајќи дека светот ќе заврши во 2060 година.

Според Њутн, крајот ќе биде обележан со војни, чума и пропаст на „злобните нации“, но ќе биде следен од повторното доаѓање на Исус Христос и воспоставување на илјадагодишен мир. Неговите пресметки се темелат на податоци од Книгата на пророкот Даниел, а датумот што го навел се совпаѓа со 1.260 години по основањето на Светото Римско Царство.

Во писмото, кое денес се чува во Еврејскиот универзитет во Ерусалим, Њутн напишал:
„Тоа може да заврши и подоцна, но не гледам причина да заврши порано… Ова го споменувам не за да ја одредам точната година на крајот, туку за да ги запрам смелите шпекулации на луѓето кои постојано го предвидуваат крајот и на тој начин ги дискредитираат светите пророштва секој пат кога нивните претпоставки ќе се покажат погрешни“.

Професорот Стивен Д. Снобелен од Универзитетот Кингс Колеџ во Халифакс, кој ја проучува историјата на науката, истакнува дека Њутн не бил само научник, туку и длабоко религиозен мислител кој ја барал „Божјата вистина“ како во природата, така и во Светото писмо.

Њутновото предвидување останува тема на дебата, а неговите идеи за спојување на науката и религијата продолжуваат да фасцинираат историчари и научници и денес.