„Плус сајз“ раперка тужи такси компанија затоа што возачот не сакал таа да се качи во неговото возило, велејќи дека ќе му ги дупне гумите

Данк Демос, позната и како Дажуа Бландинг, поднесе тужба против „Lyft“ откако возач одби да ја превезе, наведувајќи дека е премногу голема за неговото возило. Инцидентот се случил кога возачот пристигнал со „Мерцедес Бенц седан“, но, според тврдењата на раперката, тој веднаш ги заклучил вратите и се обидел да замине. Откако го соочила со ситуацијата, возачот ѝ рекол дека нема да може да ја прими во возилото и дека нејзината тежина би можела да му ги оштети гумите.

Бландинг ја сподели снимката од разговорот на социјалните мрежи, наведувајќи дека „Lyft“ ги третира луѓето со прекумерна тежина како да не припаѓаат во општеството. Додека некои коментатори ја поддржаа, други застанаа во одбрана на возачот, посочувајќи дека неговата одлука се темели на безбедносни причини, а не на предрасуди.

Нејзините адвокати истакнаа дека возачот постапил незаконски, споредувајќи го случајот со дискриминација врз основа на раса или религија. Тие нагласија дека оставањето на клиент на улица може да има сериозни последици, особено ако нема друга опција за транспорт.

„Lyft“ издаде соопштение во кое категорично осудува било каква форма на дискриминација и подвлече дека нивните насоки за заедницата забрануваат такво однесување.

Оваа тужба го отвори прашањето за балансот помеѓу правата на патниците и слободата на возачите да донесуваат одлуки врз основа на практични и безбедносни фактори.