Понекогаш парите навистина растат на дрвја: Оваа раскошно украсена елка вреди неверојатни 5,5 милиони долари – но сепак не е најскапата досега

Германски трговец со злато изгледа дека создаде една од најскапите божиќни елки во историјата, изработувајќи ја од злато во вредност од 5,5 милиони долари.

„Златното божиќно дрво на импресивен начин ја илустрира вечната вредност на благородниот метал,“ изјави Бенџамин Сума, портпарол на Pro Aurum. Приближно три метри високата елка која беше изложена во седиштето на компанијата во Минхен неколку дена, е направена во чест на 35-годишнината од основањето на компанијата.

Создадена во соработка со Австриската државна ковачница, оваа висококаратна „капиталистичка“ елка е составена од 2.024 златни монети Виенска филхармонија – една од најпопуларните колекционерски монети во светот.

Наместо традиционалната ѕвезда, оваа прескапа елка е украсена со монета од 24 карати со големи димензии. Божиќните елки, очигледно, влегуваат во својата „златна ера“ .

Но, милијардерите опседнати со злато не треба веднаш да ги фаќаат своите паричници. Pro Aurum истакна дека оваа елка не е за продажба.

Претставниците на компанијата објаснија дека елката има цел само да ја симболизира „вечно зелената“ вредност на златото.

Интересно е што оваа претерано раскошна елка не е најскапата досега. Таа чест ѝ припаѓа на една елка во вредност од 11 милиони долари, изложена во хотелот Емиретс Палас во Абу Даби во 2010 година.

Ова луксузно дрво било украсено со 181 парче накит и било високо 13,2 метри, според Гинисовата книга на рекорди.