„Правам линија кокаин пред работа – моите деца не знаат за мојата зависност“

Ова е искреното писмо на анонимна Британка, испратено до познатата советничка Колин Нолан, која јавно им помага на луѓето што се борат со зависности, проблеми со врски и животни кризи. Жената, пред својот 50-ти роденден, ги споделува своите болни искуства со алкохол и дрога, борбата да биде добра мајка, и стравот од вистината пред своите две возрасни деца.

„Наскоро ќе наполнам 50 години и се мачам. Отсекогаш сум имала проблеми со алкохол и дрога, но тоа порано беше нешто што се случуваше само за време на викендот, како „забегување“. Имам две прекрасни деца на возраст од 25 и 30 години и сега сум самохрана.

Бев во насилна врска, а потоа запознав маж за кого мислев дека е мојата вистинска љубов. Но, дознав дека користи крек и беше испратен во затвор поради грабеж. Тоа беше пред 10 години. Сепак, добро ми одеше и започнав бизнис за чистење куќи. Потоа, за време на Ковид, почнав да пијам премногу, а минатата година ѝ признав на ќерка ми дека мислам дека сум алкохоличарка.

Синот ме однесе на состаноци на АА (Анонимни Алкохоличари), но ги мразев тие средби. Сега се наоѓам во ситуација каде што пијам од моментот кога ќе се разбудам и земам линија кокаин само за да можам да одам на работа. Не сакам да им кажам на моите деца, бидејќи тие мислат дека сум подобра.

Овој месец полнам 50 години и одам на патување со целото семејство, но тонем во долгови, пиво и кокаин“.

Советот од Колин: Искреноста е првиот чекор кон вистинското закрепнување

Советничката Колин одговара: „Најважно е што веќе сте ја препознале зависноста и сте побарале помош. Следниот чекор е да побарате стручна помош од лекар и да бидете искрени за сѐ што користите. Постојат и други програми освен Анонимни алкохоличари, како што е smartrecovery.org.uk, кои користат мотивациски и когнитивно-бихејвиорални техники.“ Колин предупредува дека детоксикација сама може да биде опасна и инсистира на контролиран процес со експерти.

Колин потсетува: „Во општество каде пиењето е дел од традицијата и секојдневието, уште потешко е да се останеш трезен. Но, клучот е во искреноста пред себе и особено пред децата. Тие можеби веќе го чувствуваат вашиот проблем – ако ја знаат вистината, најверојатно ќе бидат ваша најголема поддршка.“ Зависноста не се решава преку една ноќ, но барање помош и споделување на теретот се првите и најважни чекори. Ова е вистинска приказна за скриеното страдање на мајките низ светот – и надеж дека излез има, ако имате храброст за првиот чекор.