„Рапанзел“ избега од својот замок во Австралија, но на малку поинаков начин

Многу луѓе се жалат на ограничувањата предизвикани од пандемијата КОВИД-19, но малкумина се обидоа да користат необични методи за да избегаат од карантин. Но овој човек од Австралија дефинитивно има добра имагинација кога станува збор за „филмско бегство“.

Тревис Џеј Мајлс, 39-годишник од Квинсленд, Австралија беше уапсен откако наводно избегал од карантин во хотел во Перт со помош на постелнина. Тој ги врзал чаршафите едни за други и ги искористил како што Рапанзел би ја искористила својата коса, за да се спушти низ прозорецот.

Мајлс слетал во Западна Австралија со лет од Бризбејн во понеделникот попладне, но не можел да влезе во Перт. И покрај пополнувањето на пропусница при пристигнувањето, властите откриле дека тој не ги исполнува условите за влез.

Како резултат, Мајлс бил однесен во хотел во Ривервал, пред закажаниот повратен лет за Квинсленд следниот ден. Мајлс не бил импресиониран од овие планови, а полицијата соопшти дека тој успеал да избега од хотелот во 12:45 часот, врзувајќи ги постелнините и користејќи ги како јаже од неговиот прозорец за да се спушти надолу.

Осум часа подоцна, полицајците го пронашле Мајлс на улицата Бофор во планината Лоули и го привеле. Мајлс има негативен резултат од тестот за КОВИД-19, но беше обвинет за непочитување на упатството и давање лажни или погрешни информации.