Решив на сите да им кажам ДА. Одам на 50 први состаноци, за да ја најдам љубовта на мојот живот

Каде отиде времето кога мажите се обидуваа да излезат на состанок со некоја девојка па мораа да се потрудат?

По ерата на апликации за запознавање, повторно се вратија брзите состаноци, случајните средби, тркачките клубови и други креативни начини за пронаоѓање љубов.

Сепак, младите сè потешко наоѓаат партнер, па сега се насочуваат кон екстремни методи за да стигнат до врска. Најновиот тренд подразбира „игра со бројки“: поставуваат цел да одат на 50 први состаноци, надевајќи се дека еден од нив ќе прерасне во нешто сериозно.

На TikTok, овој тренд вклучува млади дами кои го документираат својот љубовен живот – споделуваат детали за идните состаноци во видеа од типот „подгответе се со мене“, а за време на состаноците тајно даваат први импресии за потенцијалните партнери.

Многумина што учествуваат во овој предизвик велат дека „досадата“ или фрустрација од традиционалните навики за запознавање ги натерале да пробаат ваков пристап.

Целта е младите да одат на состаноци со луѓе кои „можеби не ги исполнуваат сите нивни критериуми“, со надеж дека поголемиот број состаноци ќе донесе резултати и ќе го прошири кругот на потенцијални партнери.

Овој неконвенционален метод значи дека често ќе поминуваат само една вечер со некој, а ако личноста не остави впечаток, веднаш ја исклучуваат како можен романтичен партнер.

Хаштагот „50 први состаноци“ има 67,3 милиони прегледи на TikTok, а десетици жени ширум светот го испробуваат овој пристап.

Во едно TikTok видео, креаторката Бет Колинс вели: „Одам на 50 први состаноци или барем додека не ми стане досадно или не ја најдам љубовта на мојот живот“.

Во друго видео објаснува: „Го правам ова бидејќи не сум многу искусна во состаноци, а запознавањето е всушност игра на бројки. Претходно многу се врзував за еден случаен маж со кој би отишла на состанок, што не беше здраво. Треба да почнам почесто да кажувам ‘да’ и да одам на состаноци со луѓе кои можеби не ги исполнуваат сите мои критериуми, бидејќи можеби ќе бидам пријатно изненадена“.

Бет истакнува дека е важно „да не се ставаат сите јајца во една кошница“ и дека повеќето состаноци овозможуваат поголема селективност.

„Застрашувачко е да се помисли дека некои луѓе ги вложуваат сите надежи во еден состанок. Откако почнав со овој предизвик, сфатив дека првиот состанок е буквално само запознавање“.

Креаторите најчесто користат апликации за запознавање за да ги најдат своите состаноци, но и луѓе кои ги среќаваат во реалниот живот.

Пред секој состанок, тие го претставуваат својот партнер, споделувајќи детали за него. За време на состанокот, даваат кратки ажурирања од бањата, а следниот ден објавуваат целосни впечатоци.

Една друга креаторка, Франческа, го почнала својот „маратон“ во јули, по неодамнешно раскинување.

„Отсекогаш ми се допаѓаа ваквите видеа, но бев во врска и не можев да ги испробам. Сега, по раскинувањето, сакам да одам на состаноци бидејќи уживам во запознавањето нови луѓе,“ вели таа.

И ако мислите дека Франческа не ја сфаќа сериозно работата таа сега е на 19-тиот состанок.

Други, како Бека, ја споделуваат својата авантура, истакнувајќи дека целта е да излезат од својата комфорна зона и да запознаат нови луѓе.

Трендот започна порано оваа година, кога Австралијката Хана Заславски, која живее во Лондон, почнала да објавува видеа од своето искуство со 50 први состаноци.

Хана, на 34 години, понекогаш оди на два состанока неделно, а 70% од нив ги наоѓа на Hinge. Нејзините видеа ја документираат нејзината потрага низ Лондон – од пабови и галерии до музејски посети. До сега, Хана има отидено на 38 состаноци, но не е јасно дали ќе ја достигне целта од 50.