Роверот Perseverance на НАСА откри нова мистериозна карпа на Црвената планета
Роверот Perseverance на НАСА неодамна наиде на необичен објект додека се спушташе кон долниот дел од областа наречена „Порт Енсон“, на работ на кратерот Езеро. Во изминатата недела, роверот го напушти ридот „Вич Хил“ и се упати кон границата меѓу светли и темни геолошки слоеви, забележани од орбитата.
Токму на таа геолошка граница, Perseverance откри бројни камења кои, според научниците, биле донесени од други места. Овие камења, не се совпаѓаат со околниот терен.
Неколку можни објаснувања
Посебно внимание привлече еден камен кој истражувачкиот тим го нарече „Черепов Рид“. Се истакнува по темната боја, аглестата форма и неколкуте вдлабнатини на неговата површина. Како што објасни Маргарет Дин, докторантка од Универзитетот Пердју во блогот на НАСА, околу овој камен може да се забележат сферични структури во површинската прашина, што е особено интересно за научниците.
Постојат неколку можни објаснувања за потеклото на овој објект. Едната теорија претпоставува дека станува збор за метеорит кој паднал на површината на Марс. Слични карактеристики биле забележани и кај други метеорити, пронајдени од роверот Curiosity во кратерот Гејл. Но, анализите на околните карпи засега не го потврдуваат целосно ова објаснување.
Деталното испитување продолжува
Алтернативна хипотеза е дека тоа е магматска карпа, создадена при ладење на лава, која подоцна била оштетена од ерозија или била исфрлена при ударен настан. Ваквите карпи, и на Земјата и на Марс, често содржат темни минерали како оливин и пироксен, кои се богати со железо и магнезиум.
Истражувачкиот тим на Perseverance ќе продолжи со детално испитување на оваа и слични карпи, со цел да открие како завршиле во оваа област и какви геолошки процеси стојат зад нивната појава. Тие, исто така, ќе се обидат да ги разберат мистериозните сферични формации што беа забележани и претходниот месец.
Коментирај анонимно