Што сѐ живее на нашата четка за заби? Научниците откриваат вируси на нашите тушеви и четки, а дали знаете од каде доаѓаат?

Научниците од Универзитетот Нортвестерн откриле огромен број на вируси кои живеат на нашите четки за заби и тушеви. Некои од овие микроорганизми се сосема нови за науката.

Иако ова може да ве натера да ја фрлите вашата четка за заби и да ја исчистите бањата, присуството на вируси не е секогаш лошо за нашето здравје.

Бактериите, габите и вирусите живеат насекаде околу нас, особено во местата што сме ги изградиле. Дури и кога чистиме, тие повторно се враќаат. Затоа стоматолозите препорачуваат редовно да ја менуваме четката за заби и да ја чистиме бањата за да го држиме бројот на микроби под контрола.

Но, бидејќи не можеме целосно да ги избегнеме, важно е да знаеме со кои микроби најчесто се среќаваме.

Повеќето од нас знаат дека бактериите се насекаде, но не слушаме толку многу за вирусите на површините. Всушност, научниците веќе ги проучувале бактериите на четките за заби и тушевите, кога друга група, со некои од истите истражувачи, решила да ги испита вирусите.

„Наидовме на многу вируси за кои знаеме многу малку и многу други кои никогаш порано не сме ги виделе“ вели микробиологот Ерика Хартман од Универзитетот Нортвестерн.

Кога Хартман работела на Универзитетот во Колорадо, Боулдер, таа и нејзиниот тим сакале да ги проучат микробите на четките за заби, затоа што слушнале дека испирањето на тоалетот може да шири штетни патогени низ бањата. Нивната мала студија покажала дека бактериите на четките за заби главно потекнуваат од нашите усти, а не од тоалетот – добра вест! – но исто така се запрашале за вирусите.

„Овој проект започна од љубопитност. Сакавме да знаеме кои микроби живеат во нашите домови. Ако размислите за внатрешните средини, површините како маси и ѕидови се многу тешки за микробите. Тие преферираат средини со вода. А каде има вода? Во нашите тушеви и на нашите четки за заби.“ вели Хартман.

Хартман и нејзиниот тим на Универзитетот Нортвестерн ги анализирале геномите на микробиолошките заедници на 96 тушеви и 34 четки за заби. Тие откриле многу бактериофаги – вируси кои инфицираат бактерии и се размножуваат во нив.

Интересно е што откриле дека вирусите на четките за заби и тушевите се сосема различни. Четките за заби имале поголема разновидност на вируси отколку тушевите. Ова има смисла, затоа што бактериите на четките за заби главно доаѓаат од нашите усти, додека оние на тушевите доаѓаат од околината, вклучувајќи ја и водата , а некои се познати патогени.

Иако студијата е мала, таа откри дека некои од овие вируси и бактерии можат да бидат штетни ако се размножат премногу.

Истражувачите велат дека се потребни повеќе истражувања за да се утврди дали интеракциите меѓу овие вируси и бактерии можат да доведат до здравствени проблеми, како што е ширењето на отпорност на антибиотици.

Но, Хартман советува да не паничиме.

„Микробите се насекаде, и огромното мнозинство од нив нема да нè разболат. Колку повеќе ги напаѓаме со дезинфекциони средства, толку повеќе стануваат отпорни или потешки за лекување.“ вели таа.

Оваа студија е објавена во Frontiers in Microbiomes.