Светски познатиот Сан Себастијан чизкејк на вашата трпеза – Еве како да го направите сами

Ако сте љубители на чизкејк, овој кремаст, мек и неодоливо вкусен десерт ќе ви стане омилен! Сан Себастијан чизкејкот потекнува од Баскија, Шпанија, и е познат по карактеристичната карамелизирана кора и богатата текстура што се топи во уста. Денес е хит низ целиот свет – од Истанбул до Њујорк – и често се сервира со разни преливи, овошје или чаша шампањ. Она што го прави посебен е неговата едноставна подготовка, а резултатот е вистинска гурманска магија!

✨ Совет: Сите состојки треба да бидат на собна температура пред подготовка за совршено мазна смеса.

Состојки:

500 гр маскарпоне
250 гр крем сирење
200 гр шеќер
2 ванили
4 јајца
300 мл слатка павлака
20 гр густин

Опрема:

Тавче со пречник 22 см
Хартија за печење (со висина на страните 10-12 см)
Алуминиумска фолија (ако тавчето се расклопува)

Подготовка

Обложете го тавчето со хартија за печење.
Ако користите расклопливо тавче, од надвор обвиткајте го со алуминиумска фолија до половина од висината за да спречите истекување.
Вклучете ја рерната на 200°C.

Мешање на смесата:

Во длабок сад ставете маскарпоне, крем сирење, шеќер и ванила.
Матете со миксер на најниска брзина (околу 1 минута).
Додавајте ги јајцата едно по едно, кратко мешајќи по секое.
Додадете ја слатката павлака и матете 3-4 минути.
На крај додадете го густинот (пресејте го со сито) и промешајте кратко.

Печење

Истурете ја смесата во тавчето и израмнете со силиконска мешалка.
Печете на 200°C – 30 минути.
Намалете на 175°C и печете уште 30 минути.

Ладење и стегање:

Извадете го колачот (не го проверувајте со чепкалка – треба да биде мек).
Оставете го 1 час на собна температура.
Потоа ставете го во фрижидер најмалку 3 часа (најдобро преку ноќ).
Извадете го од тавчето, отстранете ја хартијата и вратете го во фрижидер.

Сервирање:

Овој кремаст и богат колач традиционално се сече на 8 парчиња. Во Баскија се служи со чаша коњак, додека во Истанбул често додаваат преливи (карамел, чоколадо, овошје или ф’стак). Одлично оди и со чаша шампањ!

На здравје! 🥂

Извор: Магична ГАЛА кујна