Вселенската трка на Америка и Кина започна: Кој прв ќе донесе карпи од Марс?

NASA објави дека може да соработува со SpaceX на Илон Маск или Blue Origin на Џеф Безос за да ги намали трошоците за враќање на марсовските примероци собрани од роверот Perseverance. Првично планиран за испорака на 30 примероци до 2030-тите, мисијата Mars Sample Return се соочува со зголемени трошоци и доцнења.

Агенцијата разгледува две можни стратегии за слетување на платформа на Марс, со конечна одлука во 2026 година. Една опција го користи докажаниот систем Sky Crane за слетување, додека другата вклучува тежок комерцијален лендер од приватен партнер, како SpaceX или Blue Origin. Лендерот ќе носи мала ракета за лансирање примероци во орбитата на Марс, каде ќе ги преземе Европската вселенска агенција (ESA) за нивно враќање на Земјата.

NASA исто така планира да користи нуклеарна батерија наместо соларни панели за енергија, со цел да избегне проблеми со прашината на Марс. Новите опции значително ги намалуваат трошоците, проценети помеѓу $5.8 и $7.7 милијарди, а враќањето е предвидено за периодот 2035-2039, што е порано од првично планираната 2040 година.

Во меѓувреме, Кина планира поедноставена мисија за враќање на примероци до 2028 година, што би ја направило првата земја што ќе го постигне ова. NASA, сепак, ја истакнува научната и технолошката сложеност на својата мисија, која бара глобална соработка.

Роверот Perseverance слета на Марс во 2021 година за да бара докази за древен микробен живот на планетата.