Запознајте го „џуџето“ Ванила – помошничката на Дедо Мраз којашто работи во неговата канцеларија во Лапонија 365 дена во годината

Во срцето на финска Лапонија, на границата со Арктичкиот круг, се наоѓа Рованиеми, град кој низ зимските месеци блеска со снежна белина и светкави сијалички. Со нешто повеќе од 65.000 жители, овој град е официјалното седиште на еден од најпознатите луѓе во светот – Дедо Мраз.

Во селото на Дедо Мраз, лоцирано во близина на градот, се наоѓаат канцеларијата и поштата на Дедо Мраз, каде армија од џуџиња го обработуваат огромниот број писма кои пристигнуваат од сите краеви на светот. Иако Божиќ е само еднаш годишно, Дедо Мраз и неговите џуџиња се достапни секој ден од годината.

Една од овие џуџиња е Ванила, која преку својата работа во Канцеларијата на Дедо Мраз успеала да ја пронајде својата вистинска природа.

„Луѓето понекогаш се прашуваат дали навистина сум џуџе. Но, јас читам писма, подготвувам подароци и им помагам на гостите. Што уште треба да направам за да докажам дека сум вистинско џуџе?“ вели Ванила. Таа додава дека, за разлика од стереотипите, џуџињата доаѓаат во различни форми, со уникатни таленти и способности.

Ванила работи во Канцеларијата на Дедо Мраз од 2012 година, каде што секој ден носи нови искуства. За време на најголемата сезона, околу 50 џуџиња се дел од тимот, помагајќи му на Дедо Мраз и креирајќи незаборавни моменти за посетителите. „Ова е уникатна работна средина,“ вели Ванила. „Џуџиња доаѓаат од целиот свет, а возраста не е пречка – може да имате 18 или 62 години и да бидете џуџе“.

Покрај средбите со Дедо Мраз, посетителите можат да уживаат во сафари со ирваси, возење со кочии или да ја набљудуваат поларната светлина. Зимата е најпрометниот период, но и летото привлекува туристи, кои можат да уживаат во реките, езерата и природата. Долгите, темни зимски месеци, кога сонцето едвај се појавува, ја прават атмосферата во селото уште помагична.

„За време на поларната ноќ, сонцето не се појавува два дена во Рованиеми. Но, до Божиќ, деновите почнуваат да стануваат подолги“, објаснува Ванила.

И покрај зафатениот распоред, Ванила го цени времето за себе помеѓу сезоните, уживајќи во активности како скијање и пливање. По повеќе од една деценија работа, таа сонува еден ден да биде исто толку позната како Дедо Мраз. „Можеби за 150 години ќе бидам позната како него“, вели низ смеа.