Животните често си се „пијанчат“, тие конзумираат многу повеќе алкохол отколку што мислевме – еве како

Еколозите откриваат дека животните што јадат овошје можеби редовно внесуваат природен етанол, кој се создава при ферментација. Претходно се сметаше дека ова се случува ретко и случајно, но новото истражување покажува дека ниски дози на етанол се присутни во речиси секој екосистем, посебно кај овошјето што се ферментира природно.

Кимберли Хокингс, еколошки истражувач на Универзитетот во Ексетер, истакнува дека етанолот е многу почест во природата отколку што се мислеше и дека животните што јадат овошје речиси неизбежно се изложени на него. Истражувањето опфаќа повеќе од 100 научни извори и открива дека оваа појава има корени од пред околу 100 милиони години, кога квасецот прв пат почнал да ферментира нектар и овошје од првите цветни растенија на Земјата.

Се верува дека етанолот е знак за храна богата со шеќер и енергија, што значи дека животните можеби развиле метаболичка способност за обработка на овој алкохол. Авторите објаснуваат дека животните кои консумирале ваква храна со висока енергетска вредност можеби стекнале подобра метаболичка ефикасност за да ја искористат оваа дополнителна енергија.

Ова истражување исто така ја поддржува „хипотезата за пијаниот мајмун“, според која љубовта на луѓето кон алкохол можеби потекнува од нашите предци, примати кои избирале ферментирано овошје поради неговата висока нутритивна вредност и стимулирачки ефект. Првичните истражувања покажуваат дека некои примати, како луѓето, шимпанзата и горилите, поседуваат ензим кој им овозможува ефикасно разградување на етанолот, што е резултат на мутација од пред околу 10 милиони години.

Иако премногу етанол може да биде штетен, некои животни успеале да развијат толеранција на ниски дози, со што се избегнуваат негативните ефекти на опијанетост, како што е ранливоста на предатори. Ова откритие покажува дека консумацијата на етанол е длабоко вкоренета во еволутивната историја на многу животни, вклучувајќи и нас.