Американските училишта почнаа да преминуваат на систем со 4 работни дена. Што значи тоа за родителите?

Сè повеќе училишни окрузи во САД преминуваат на четиридневна работна недела, со цел да привлечат и задржат наставен кадар, но ваквата промена предизвикува мешани реакции кај родителите.

Во Тексас, независниот училишен округ Витни неодамна одлучи да воведе четиридневна училишна недела, почнувајќи од учебната 2025 година. Со ова, Витни се приклучува на десетици окрузи во Тексас и над 900 на национално ниво кои ја усвоија оваа практика. Целта на оваа промена е да се привлечат наставници во професијата, со оглед на тоа што многумина ја напуштаат поради ниските плати, прегореност и постојани критики.

via GIPHY

Наставниците во овие окрузи често го поздравуваат новиот распоред, бидејќи им овозможува дополнителен ден за планирање, одмор или поминување време со семејството. Учениците, исто така, се задоволни од дополнителниот слободен ден. Сепак, многу родители изразуваат загриженост. Тие се соочуваат со предизвици во обезбедувањето грижа за децата на слободниот ден, особено оние кои работат со полно работно време. Дополнително, некои родители стравуваат дека пократката училишна недела може негативно да влијае на академските постигнувања на нивните деца.

Во Индијана, основното училиште Винтон во Лафајет е првото во државата што ќе премине на четиридневна училишна недела во учебната 2024-2025 година. Новата програма предвидува настава од понеделник до четврток, со продолжени училишни денови за еден и пол час. Иако мнозинството од анкетирани наставници и родители ја поддржале промената, некои изразиле загриженост, особено во однос на грижата за децата во петок. Локалните организации, како што се YMCA и блиската црква, нудат достапни опции за грижа, но досега само мал број родители ги искористиле овие услуги. Некои родители се загрижени за подолгите училишни денови и дополнителните трошоци за дневна нега, додека други се оптимисти, посочувајќи потенцијални придобивки како подобрено присуство и ментално здравје.

Иако податоците покажуваат дека ваквиот скратен распоред помага во зголемување на бројот на пријави за работа од наставници и намалување на пензионирањата, влијанието врз учениците и нивните семејства останува тема на дебата. Додека некои родители ја ценат можноста за дополнително семејно време, други се загрижени за влијанието врз нивните работни распореди и благосостојбата на децата.

Овој тренд на четиридневна работна недела не е ограничен само на образовниот сектор. Голем меѓународен експеримент со четиридневна работна недела покажа дека таквиот концепт на работа им се исплати и на работодавците и на вработените, така што огромното мнозинство на компании кои учествуваа во експериментот одлучија да не се вратат на стариот работен систем. Се покажа дека вработените кои работеле по тој концепт успеале да ги завршат сите зададени задачи со дополнително намалување на работното време. Со други зборови, колку подолго луѓето работеа на нови, поефикасни начини, толку нивните работни недели стануваа пократки.

Додека некои училишни окрузи и компании гледаат позитивни резултати од четиридневната работна недела, останува да се види како оваа промена ќе влијае на долгорочните академски и социјални аспекти за учениците и нивните семејства.