Баба споделува 3 клучни правила што сите нови баби и дедовци треба да ги следат: „Не, вие не сте родителот!“

Конфликтите меѓу родителите и бабите и дедовците често се неизбежни, а најчесто произлегуваат од генерациските разлики. Кога сегашните родители биле деца, немало паметни телефони, ниту платформи како Disney+ и Netflix. Во 80-тите и 90-тите години, децата имале повеќе слобода и помалку надзор, а концепти како „нежно родителство“ и „свесно родителство“ не биле толку популарни. Денес, истражувањата покажуваат поинакви пристапи, иако претходните генерации одгледувале деца со најдоброто знаење што го имале во тој момент.

Природно е бабите и дедовците да имаат свои мислења за воспитувањето на нивните внуци. Најчестите несогласувања се околу дисциплината, исхраната и времето поминато пред екрани. Ако овие конфликти станат пречести или премногу се влошат, бабите и дедовците може да бидат оддалечени од животот на внуците. Затоа е важно да се најде начин за нивно решавање пред да дојде до сериозни проблеми.

Инфлуенсерката Марија, позната како MomMom Maria, на Инстаграм сподели три едноставни, но директни совети за новите баби и дедовци.

Правило број еден: Вие не сте родителите

„Тоа е клучно. Вие не сте родител на ова дете“, вели Марија. „Вие сте привилегирани што сте баба или дедо, но не сте мајката.“

Родителите ги носат одлуките за своите деца – како ќе бидат воспитани, дисциплинирани, што ќе јадат и што ќе гледаат на телевизија. Бабите и дедовците можат да имаат мислење, но не и конечен збор. Ова можеби звучи строго, но е вистина.

Правило број два: Почитувајте ги границите на родителите

„И не мора да ги разберете!“ истакнува Марија. „Не разбирам зошто не сака да го бакнуваме бебето!’Не мора да разберете – доволно е да ги почитувате нивните граници“.

Конфликтите не мора да произлегуваат само од различни пристапи кон воспитувањето. Често проблем е што бабите и дедовците ги разгалуваат децата со подароци, иако родителите бараат да не се купуваат работи без претходен договор. Без разлика дали ја разбираат или не одлуката, Марија нагласува дека мора да ја почитуваат.

Правило број три: Не се работи за вас

„Не сте жртва. Не сте слаби. Едноставно ги почитувате родителите и нивната улога, прифаќајќи дека вашата улога е да бидете баба или дедо. И тоа е прекрасно!“

Задржувањето на сопствените критики не значи слабост, туку почит кон родителите. Ова создава позитивни односи и овозможува бабите и дедовците да бидат дел од животот на своите внуци без непотребни тензии. Со текот на времето, ова вложување ќе носи сè повеќе убави моменти за сите.