Британските медиуми: Можно е праќање на мигранти во Македонија

Неуспешните баратели на азил би можеле да бидат депортирани во Македонија според план за намалување на премините преку Ла Манш.

Балканската држава влезе во формални разговори со Обединетото Кралство за воспоставување „центар за враќање“ за одбиени баратели на азил, како дел од шема што треба да ги одврати мигрантите од преминување со мали чамци.

Тоа е една од двете балкански земји кои наводно покажале интерес за шемата, при што Обединетото Кралство е подготвено да им плаќа за секој мигрант што ќе го прифатат.

Косово претходно беше споменато како втора заинтересирана држава. Таму веќе постои договор за прифаќање нелегални мигранти од САД, иако Косово предупреди дека има „ограничени капацитети“.

Мигрантите би биле депортирани и би им била понудена можност да побараат азил во Македонија, но нема да бидат задржувани ниту ограничувани во движењето, што значи дека би можеле слободно да ја напуштат земјата доколку сакаат.

Тие би биле охрабрувани да побараат азил или да аплицираат за работни визи во сектори со голем недостиг на работна сила, како што е градежништвото.

Албанија одби сличен предлог од Британија, иако има постигнато договор со Италија за сместување мигранти додека трае обработката на нивните барања за азил. Ако барањето им биде одобрено, тие се враќаат во Италија; доколку е одбиено, следува депортација.

Испраќање порака до мигрантите

Босна и Херцеговина ја одби понудата од Британија, наведувајќи дека прифаќањето одбиени баратели на азил е „некомпатибилно“ со нејзините национални интереси.

Потенцијалните договори со Македонија и Косово се дел од серија мерки за одвраќање мигранти, особено од земји како Авганистан, Еритреја и Судан, од каде што е тешко да се изврши депортација.

Ако мигрантите можат да се пренесат во „центри за враќање“ во трети земји на Балканот, тоа би испратило порака до другите дека сепак може да бидат отстранети од Британија, дури и кога не е возможно да се вратат во нивните матични држави.

Германија и Данска се меѓу европските земји што ја разгледуваат истата идеја, а Агенцијата за бегалци на ООН соопшти дека би ја поддржала доколку се почитуваат стандардите за човекови права.

Секој договор што би го постигнал Кир Стармер веројатно би бил поврзан со пошироки спогодби за инвестиции и безбедносна соработка за справување со ризици од руска инфилтрација и сајбер-напади.

Лабуристите се трудат да ги дистанцираат овие предлози од планот на Ториевците за Руанда, кој беше различен затоа што предвидуваше депортирање на мигранти пред да им бидат разгледани барањата за азил.

Министерството за внатрешни работи смета дека новиот план би бил помалку подложен на правни оспорувања, бидејќи мигрантите прво би имале фер постапка во Британија и нивните барања би биле одбиени, што значи дека немаат законско право да останат.

Ова е една од мерките за справување со кризата со малите чамци, меѓу кои е и договорот со Франција за „еден внатре – еден надвор“, по кој Франција ќе враќа мигранти што го преминале Ла Манш, а Британија ќе прифаќа ист број легални баратели на азил од Франција.

Досега повеќе од 39.000 мигранти го преминале Ла Манш оваа година — 6.000 повеќе од лани во исто време, но 3.000 помалку од рекордната 2022 година.