Бугарката Андреа Иванова продолжува да руши рекорди

Андреа Иванова од бугарскиот град Софија, која себеси се смета за сопственичка на најголемите усни во светот, ја објави својата желба да ги зголеми јаболчниците на рекордно ниво.

25-годишната девојка веќе потрошила околу 1.800 евра за полнење на јаболчниците, како и нови филери за брадата и усните. Лекарите ја предупредија дека следните инјекции може да бидат опасни по живот, но Иванова реши да не го слуша нивното мислење.

Нејзината главна цел е да стане како човечката верзија на куклите Братц.
„Сакам да ги имам не само најголемите усни на светот, туку и најголемите јаболчници на светот. Досега имав четири инјекции на хијалуронска киселина во јаболчниците, но наскоро ќе ставам уште две“, рече Андреа Иванова.

Во исто време, Иванова нема да престане со инјектирање на усните. „Моите усни сè уште не се доволно големи и сакам да бидат многу поголеми отколку што се сега“, им рече таа на новинарите.

Девојката признава дека нејзиниот необичен изглед многу и го отежнува наоѓањето љубов. Сепак, таа не се откажува од обидите да се сретне со својата сродна душа и целосно ги игнорира коментарите на бројните хејтери.

Андреа Иванова почнала активно да го менува својот изглед во 2018 година. Таа редовно ги пумпала усните со хијалуронска киселина, а имаше и операција за зголемување на градите. Бугарката признала дека ги посетила речиси сите клиники во родниот град и ги пробала речиси сите можни видови филери. Во текот на пет години, таа потрошила 9000 евра само за филери за усни.