Читањето е безвременска навика: Јубилејно 35 издание на Меѓународниот саем на книгата со богата програма од 4-ти до 10-ти мај

Доколку ги рангираме и разгледуваме најздравите навики, коишто може да ги поседува модерниот човек, која би била на прво место? Во дигитално доба со намален фокус и примање на информации, најздравата навика на човекот дефинитивно би требало да биде токму читањето. Но зошто само модерниот? Читањето е и би требало да биде бeзвременска навика во секоја претстојна година, декада, век. Главната причина? Читањето нѐ прави луѓе.

Можеби најочекуваната културна манифестација во земјата, чија главна цел е славење на убавината на пишаниот збор, а и создавањето на бесконечен број на светови со моќта на јазикот, – и тоа од страна на голем број домашни, а и странски автори, е секако Саемот на Книга. А оваа година се одржува неговото јубилејно 35 издание.

Првиот саем на книгата во Скопје е одржан во далечната 1989 година и до денес саемот нема прекин. Тоа е единствениот саем кој ѝ пркосеше на пандемијата.

Организаторот, Скопски Саем, најавува богата седумдневна програма со над 60 издавачки куќи, а се очекува бројот на посетители да се искачи и до 30.000, како пред пандемичниот период. Цената на редовна влезница ќе изнесува 80 денари, а 50 денари по лице ќе изнесува цената за организирани групи ученици. Додека пак за семејствата со деца, децата ќе влегуваат бесплатно.

Билетите ќе бидат достапни за купување на влезот на Арена – Борис Трајковски, но секако, – и за сите љубители на дигиталните услуги, сите заинтересирани ќе можат да ги набават своите билети за саемот и онлајн преку Karti.com.mk: https://www.karti.com.mk/saem-na-kniga-2023.nspx

Во рамките на неколкудневната програма, се очекува присуство на голем број интересни домашни и странски автори, со промоција на нови книги во официјалниот Промотивен центар во Арената, а секако и на штандовите на издавачите се најавуваат едукативни работилници и цртање за најмладите посетители, како и средби со автори и потпишување книги.

Тоа што организаторите успеаја да го направат оваа година, заедно со техничкиот дел е целосно саемско уживање. Нема да се гледаат седиштата и нема да се чувствувате дека сте во арена.

Една од главните цели на годинешното јубилејното 35. издание на Меѓународниот Саем на книга е одбележување на важноста за зачувувањето на мајчиниот македонски јазик, како главен идентитет на народот, а за истото, програмата на Саемот ќе се фокусира и на активност и програма која ги слави познатите легенди, кои имаат оставено значителен печат во македонската книжевност. На 5 мај, во петок, во 12:00 ч. ќе биде организирана трибина во организација на Македонската асоцијација на издавачи по повод Денот на македонскиот јазик.

А покрај тоа на саемот ќе има повеќе од 60 настани, промоции, средби со автори, дискусии и други активности. За децата ќе има креативни работилници како и дружба со Стела, Сани, Биби.

Саемот на книга 2023 ќе трае од 4ти до 10ти мај 2023 година, во Арена – Борис Трајковски во Скопје, секој ден од 10:00 до 20:00 часот, а на 10.05.2023 година, саемот ќе биде отворен сѐ до 18:00 часот.

Исто така саемот има доставено барање до ЈСП за да има вонредни автобуски линии до арената Борис Трајковски и се очекува дека тоа барање ќе биде одобрено.

Покровител на Саем на книга традиционално е Министерството за култура.

За сите дополнителни информации во текот на претстојниот саем, следете го Скопски Саем на  www.skopskisaem.mk и на @skopski.saem на Instagram и Скопски саем – Skopski saem на Facebook.

Мирисот на нова книга ја најавува пролетта.