Дали навистина САД ќе испрати затвореници во Ел Салвадор, во затворот од којшто никој никогаш не излегол?

Во Ел Салвадор, затворот познат како ЦЕКОТ (Центар за притвор на тероризмот) би можел да стане нов дом за осудени странски државјани од САД, според плановите на администрацијата на Доналд Трамп. Овој мегазатвор, изграден за да смести до 40.000 луѓе, веќе е под остри критики од страна на организациите за човекови права.

По враќањето на функцијата, Трамп најави договор со Ел Салвадор, според кој ЦЕКОТ ќе прима криминалци што се странци, но и некои американски државјани или легални жители. Сепак, официјален претставник на американската влада изјави дека засега нема конкретни планови за ваква мерка.

Затворот има исклучително строги правила – затворениците мора да ги бричат главите на секои пет дена, а условите се опишани како нечовечки. Над 100 затвореници се сместени во една просторија со само два тоалети, два мијалници и 80 кревети без душеци.

Иако во Ел Салвадор нема смртна казна, властите јасно ставија до знаење дека тие што влегуваат во овој затвор нема да излезат. Министерот за јавна безбедност, Густаво Виљаторо, изјави дека веруваат во рехабилитација, но само за „обични криминалци“.

„Некој што секојдневно убивал и силувал, како може да му се промени умот? Не сме наивни“, изјави тој.

Бегството од ЦЕКОТ е речиси невозможно, бидејќи затворот е еден од најобезбедените во светот. Затворениците поминуваат 23,5 часа дневно во своите ќелии, без работа, книги или контакт со семејството, со само 30 минути дневно за групно вежбање или читање на Библијата.