Дали образованието е во криза? Студентите масовно користат вештачка интелигенција за да мамат на факултет – случаите зголемени за 700%

• Драстично зголемување на академските измами со вештачка интелигенција
• Загриженост кај експертите и политичарите
• Како универзитетите реагираат на проблемот?
• Зголемена употреба на ВИ меѓу студентите
• Потреба од реформи во образованието

Драстично зголемување на академските измами со вештачка интелигенција

Шкотските универзитети минатата година забележале повеќе од 1.000 случаи на академски измами поврзани со вештачка интелигенција (ВИ), што претставува зголемување од 700% во споредба со претходната година.
Според објавените податоци, бројот на инциденти поврзани со ВИ пораснал од 131 случај во академската 2022-23 година на 1.051 во 2023-24 година. Оваа тенденција предизвикува сè поголема загриженост за злоупотребата на технологијата.

Загриженост кај експертите и политичарите

Мајлс Бригс, портпарол за образование на шкотските конзервативци, кој ги добил податоците преку закон за слобода на информации, ја нарече оваа појава „крајно загрижувачка“ и предупреди дека вистинскиот број на случаи може да биде многу поголем.
„Овие бројки покажуваат дека ВИ прави хаос во универзитетите и создава големи проблеми за професорите. Ако студентите користат ВИ за да избегнат размислување и самостојна работа, тоа ќе ја поткопа репутацијата на нашите универзитети на меѓународно ниво“, изјави Бригс за The Scotsman.

Како универзитетите реагираат на проблемот?

Неколку универзитети во Шкотска воведоа нови категории за академска недисциплина поврзана со ВИ:

• Универзитетот Абертеј во Данди регистрирал 342 случаи на „неприфатлива употреба на ВИ“ во 2023 година.
• Универзитетот Стерлинг има 200 потврдени случаи.
• Роберт Гордон Универзитетот во Абердин пријавил 116 случаи.
• Глазгов Калеедонијан Универзитет потврдил 113 инциденти.
• Универзитетот во Глазгов имал 130 пријави, од кои 86 довеле до казни, но не сите биле поврзани исклучиво со ВИ.
• Единбуршкиот универзитет казнил 78 студенти за академски прекршоци поврзани со ВИ.
• Некои универзитети како Напиер во Единбург изјавиле дека немаат евиденција за вакви случаи, додека Квин Маргарет и Универзитетот во Данди не ги разликуваат ВИ-инцидентите од другите дисциплински прекршоци.

Зголемена употреба на ВИ меѓу студентите

Истражување спроведено врз 1.000 додипломци од британски универзитети покажало „експлозивен пораст“ на користењето на генеративна ВИ.
88% од студентите изјавиле дека користеле алатки како ChatGPT за нивните задачи, во споредба со 53% во претходната година.

Потреба од реформи во образованието

Фокус група организирана од Шкотската квалификациска агенција покажа дека многу наставници и професори сметаат дека начинот на оценување треба да се ревидира поради порастот на ВИ.
Претставник на Универзитетите на Шкотска изјави:
„Универзитетите секогаш ќе ги третираат академските измами сериозно, вклучително и неправилното користење на ВИ. Оваа технологија носи и ризици и можности – треба да ја прифатиме, но и да осигуриме дека студентите ја користат соодветно и не се потпираат целосно на неа.“