Додека НАСА се „туфка“, Кина веќе подготви тим за планетарна одбрана на Земјата од можниот удар на астероидот 2024 YR4

Кина формира „тим за планетарна одбрана“ во подготовка за астероидот кој има мала, но не занемарлива шанса да ја погоди Земјата.

Кина планира да развие сопствена стратегија за одбрана од астероиди, која вклучува лансирање на мисии за отклонување на потенцијални закани. Покрај тоа, земјата инвестира во напредни телескопи и сателитски системи за подобар мониторинг и брза реакција во случај на опасност.

Астероидот 2024 YR4, со пречник од околу 100 метри, може да уништи цел град доколку удри на несоодветно место. Иако шансите за судир се околу 2,3 проценти (или 1 во 43), научниците не ја занемаруваат можноста за потенцијална закана.

Овој астероид е откриен во декември и според пресметките, доколку навистина удри, би пристигнал за околу седум години. Засега, тој ќе стане невидлив за неколку месеци и повторно ќе биде забележлив дури во 2028 година.

Кинескиот тим за планетарна одбрана ќе се фокусира на мониторинг на астероидот, а меѓународни научници веќе добиле пристап до телескопот Џејмс Веб за подобро проучување на неговите карактеристики и можните стратегии за одбрана.

Доколку постои реална опасност, постојат неколку можни решенија. Со доволно време, може да се испрати мисија за пренасочување на астероидот, што би го оттргнало од патеката на судир. Ако времето е ограничено, би можела да се примени стратегија за уништување на астероидот пред да стигне до Земјата.

Среќна околност е што астероидот е откриен многу години однапред, што овозможува научниците да работат на превентивни мерки, наместо човештвото да биде ставено пред ненадејна катастрофа.