Додека смртта не нè раздели: 100-годишни маж и жена кои биле во брак 79 години и починале со само неколку часа разлика, открија како никогаш немале сериозна расправија

Љубовната приказна на Џун и Хуберт Маликот заврши минатата недела по речиси осум децении заедно, а според нивниот син Сем (76) тие си отишле заедно.

Сем изјави дека неговата мајка тешко се разболела ден по Денот на благодарноста и била ставена на нега во болницата Хамилтон во Охајо. И да гледа како неговата сопруга се влошува било премногу за Хуберт кој набргу исто така се разболел и бил примен во истиот центар за нега.

„Тој навистина се распадна“, изјави нивниот син Сем.

Двојката ја делела просторијата во центарот, каде и двајцата биле во несвест пет дена. Но, околу 21 часот на 30 ноември, Хуберт за жал починал во сон. А според Сем, причината за неговата смрт било „скршено срце“. 20 часа подоцна, околу 18 часот на 1 декември, починала и Џун.

„Тие си отидоа заедно“, изјави Сем за медиумот. „Се чувствувам тажно, но не треба. Кој може да очекува да живее таков живот? Тие живееја долг, среќен живот заедно и беа посветени на Бога и на семејството“.

Тие првпат се сретнале во 1941 година на црковна служба и се венчале една година подоцна, кога и двајцата имале 20 години, додека Хуберт бил дома на одмор од американската морнарица.

„Кога ја видов, знаев дека таа е вистинската“, изјави Хуберт претходно за „CBS Local 12“

Тие добиле три деца во текот на годините, кои пак им дале седум внуци и 11 правнуци.

Уште во јуни, откако ја прославија 79-годишнината од бракот, парот во разговор со „Today Parents“ сподели некои тајни за нивната долготрајна љубов, а Хуберт изјави за медиумот дека тие направиле своја мисија никогаш да не влезат во сериозна расправија.

„Не поминавме низ животот без проблеми, но никогаш не би направиле ништо за да се повредиме еден со друг“, сподели тој.

Џун, исто така, изјави за Local 12: „Не сме имале ниту една кавга“, а Хуберт додаде: „Никогаш не сакате да го повредите оној што го сакате. Ставете ги на прво место, над сопствените чувства. Ако имате потешкотии, разрешете ги. Би ве советувал да не си легнувате лут“.

Тој објасни дека тие се радуваат во правењето едноставни работи заедно, како гледање стари вестерн филмови, и откри дека седнуваат на вечера заедно секоја вечер.

„Никогаш навистина не сме излегувале многу. Кога децата беа помали, бевме среќни седејќи околу масата и споделувавме приказни за нашиот ден“, продолжи тој. „Имавме прекрасен живот“.

Нивната ќерка Џо исто така изјавила дека нејзините родители се „многу среќни што се гледаат“ секое утро и дека секогаш се „поздравуваат со огромни насмевки“.