Два „вонземски“ минерали досега невидени на Земјата се откриени во метеорит тежок 14 тони што се урна во Сомалија

Најмалку два нови минерали кои не се видени на Земјата се идентификувани во метеорит тежок 14 тони пронајден во Сомалија пред две години. Минералите биле пронајдени во едно парче од вселенската карпа, кое било испратено до Универзитетот во Алберта, за кој се верува дека открил потенцијален трет нов минерал. Двата новооткриени минерали се именувани како елалит и елкинстантонит.

Метеоритот го добил името во чест на градот каде што е пронајден, што е и името дадено на првиот минерал. Вториот беше именуван по Линди Елкинс-Тантон, директорка на Интерпланетарна иницијатива на Државниот универзитет во Аризона и главен истражувач на претстојната мисија на НАСА Психа. Елкинс-Тантон планира да испрати сонда за да го испита астероидот богат со минерали за докази за тоа како се формирале планетите на нашиот Сончев систем.

Крис Херд, професор на Катедрата за Земјата и атмосферските науки и куратор на колекцијата метеорити на Универзитетот во Алберта, во изјавата рече: „Секогаш кога ќе пронајдете нов минерал, тоа значи дека вистинските геолошки услови, хемијата на карпите, e различнa од она што било пронајдено претходно. Тоа е она што го прави ова возбудливо: во овој конкретен метеорит, имате два официјално опишани минерали кои се нови за науката“.

Херд исто така е оптимист дека би можеле да се откријат повеќе нови минерали доколку истражувачите земат повеќе примероци од метеоритот. Метеоритот слетал надвор од градот и прво бил откриен од сточари на камили кои ги предупредиле експертите. Вселенската карпа е околу двапати погуста од обична карпа на Земјата и е толку магнетна – вакво нешто не е забележано на нашата планета.

Додека Херд го анализирал метеоритот за да го класифицира, видел нешто што му го привлекло вниманието. „Првиот ден кога направив некои анализи. Имаше најмалку два нови минерали таму“, вели Херд. „Тоа беше феноменално. Повеќето време е потребно многу повеќе работа од тоа за да се каже дека има нов минерал“.

Брзата идентификација била можна затоа што двата минерали биле синтетички создадени претходно од француски истражувачи во 1980-тите. Херд забележува дека „не може да се нарече минерал додека не се најде во природата“. Истражувачите продолжуваат да ги испитуваат минералите за да утврдат што можат да ни кажат за условите во метеоритот кога се формирал.

Додека иднината на метеоритот останува неизвесна, Херд рече дека истражувачите добиле вести дека се чини дека е преместен во Кина во потрага по потенцијален купувач. Останува да се види дали ќе бидат достапни дополнителни примероци за научни цели.