Фановите на Ники Минаж бараат враќање на парите за картите за „срамниот“ концерт во Даблин – ѕвездата доцнела цели 90 минути и настапила помалку од 1 час

Обожавателите на Ники Минаж кои присуствуваа на „срамниот“ концерт на раперката во Даблин, бараат враќање на парите за нивните карти, откако таа доцнеше цели 90 минути и настапила помалку од еден час.

Ѕвездата (41), која по потекло е од Тринидад и Тобаго, но е израсната во Квинс, Њујорк, требала да се појави на сцената во замокот Малахиде после 20 часот во саботата навечер. Сепак, пејачката наводно се појавила пред 22 часот – оставајќи ги бесни нејзините 20.000 обожаватели, кои чекале на дожд на отворено. Според локалните медиуми, настапот на Ники траел помалку од еден час – вклучувајќи 10-15 минути за повеќекратни промени на костими.

Влезниците за првото шоу на раперката во Даблин почнуваа од 90 евра за стандарден влез, а таа не понуди никакво објаснување за нејзиното доцнење на сцената. По катастрофалниот настап, фановите го споделија своето разочарување на „X“ и побараа организаторите да им ги вратат парите.

По нејзиното шоу во Даблин, Ники се повлече од нејзиниот фестивалски настап во Романија во неделата поради „безбедносни причини“. Во изјавата, раперката рече дека била предупредена за „протести во областа“ во близина на фестивалот „Сага“ во Букурешт и дека морала да носи „здрави одлуки“ како мајка.

Нејзиниот „X“ пост гласеше: „Поради загриженост за добросостојбата на нашиот тим и мене, ме советуваа да не патувам на фестивалот во Романија вечерва поради безбедносни причини во врска со протестите во областа. Со нетрпение очекувам да ве видам сите во некое друго време“.

Сепак, ѕвездата рече дека е „многу возбудена што ќе ги види нејзините обожаватели“ кога ќе настапи на фестивалот „Wireless“ во Лондон во петок. Во мај, Ники го пропушти своето шоу во арената „Co-op Live“ во Манчестер, откако беше приведена на аеродромот Шипхол во Амстердам под сомнение за прекршоци за дрога.

Поддржувачите на Минаж, кои се нарекуваат со колективното име Барбз, ги критикуваа организаторите затоа што ги пуштиле да влезат внатре и да трошат пари и покрај тоа што шоуто не се одржало.