Германската партија „АфД“ на чело со контроверзната Ангела Вајдел, вети „целосно затворање на границите за 100 дена“ и „ремиграција“ на имигрантите, доколку партијата биде успешна на претстојните избори

Германската крајно десничарска партија „AfD“ најави целосно затворање на границите во првите 100 дена од евентуалното владеење и масовни депортации на мигрантите. Лидерката Алисе Вајдел го претстави изборниот манифест во Риса, поддржувајќи политика на „ремиграција“, без оглед на државјанството на мигрантите.

Вајдел беше потврдена како кандидат за канцелар пред претстојните избори на 23 февруари. Според неа, идната влада предводена од „AfD“ би презела остри мерки за контрола на миграцијата и репатријација на мигрантите без документи. И покрај контроверзноста на терминот „ремиграција“, Вајдел изјави дека ќе го користи отворено.

Партијата ужива поддршка од околу 22 проценти од гласачите, што е највисок резултат во нивната историја. Сепак, останува мала веројатност „AfD“ да формира влада поради долгогодишниот консензус меѓу главните партии за исклучување на крајната десница од владеењето, особено поради историските асоцијации со нацистичкото минато.

И покрај тоа, Вајдел успеа да привлече значително внимание на изборната кампања, вклучително и со поддршка од Илон Маск, кој го сподели партискиот конгрес преку својата платформа. Маск предизвика контроверзии поради неговата поддршка за партија што германските разузнавачки служби ја сметаат за екстремистичка.

Вајдел, која живее во Швајцарија со својата партнерка од Шри Ланка и нивните два сина, негира обвинувања за фашизам и се обидува да се дистанцира од семејното наследство како внука на судија назначен од Хитлер. Таа тврди дека „AfD“ е конзервативна, а не екстремно десничарска партија.

Во источната германска држава Тирингија, „AfD“ постигна историски успех, освојувајќи речиси третина од гласовите. Зголемената реторика за миграцијата влијае и на другите партии, кои се обидуваат да повратат гласови од „AfD“.