Илон Маск добива 400 милиони долари од Стејт департментот за блиндирани Тесли, иако во многу други сфери федералниот буџет беше драстично намален

Изгледа дека Tesla на Илон Маск ќе добие договор од 400 милиони долари од американскиот Стејт департмент, иако „Првиот пријател“ на Доналд Трамп бара кратења во буџетот преку Министерството за Владини Ефикасности (DOGE).

Ова доаѓа по договорот вреден 38,5 милиони долари што SpaceX на Маск го доби во понеделник, што предизвика негодување кај либералите.

Стејт департментот, предводен од Марко Рубио, изгледа дека го изменил прогнозираниот буџет за четвртиот квартал, вклучувајќи ја набавката на „блиндирани Тесли“ во вредност од 400 милиони долари.

Сепак, вакво возило сè уште не постои, а измената на буџетот е направена на 13 декември.

Според Drop Site News, во прогнозата под насловот „степен на завршеност“ за набавката на Tesla, стои ознаката „TBD“ (ќе биде одредено).

Претседателот на DOGE има големо искуство со владини договори, бидејќи SpaceX и Tesla имаат добиено вкупно 18 милијарди долари во федерални договори од 2015 година, сè уште од времето на администрацијата на Барак Обама.

Зборувајќи со новинарите во Овалната соба во вторникот, Маск инсистираше дека нема конфликт на интереси ако неговите компании добиваат владини договори од агенции во кои тој истовремено врши буџетски кратења.

„Треба да се гледа секој договор поединечно“, рече Маск, додавајќи дека тој лично не ги поднесува договорите, туку неговите вработени аплицираат за владините тендери.

„Ако најдете договор што му е доделен на SpaceX, а не е најдобрата вредност за парите на даночните обврзници, кажете ми – бидејќи секој од нив е најдобар“, предизвика Маск.

Маск е извршен директор на SpaceX, Tesla, а во 2022 година ја купи и социјалната мрежа Twitter, која ја преименува во X.

Договорот со SpaceX беше потпишан во понеделник, 10 февруари, и вреди точно 38.858.978 долари. Тој беше доделен од страна на NASA, независна агенција во рамките на извршната власт.

Во меѓувреме, минатата недела Маск ја затвори USAID со согласност од претседателот Доналд Трамп.

Четворица високи финансиски службеници во FEMA беа отпуштени оваа недела, откако DOGE откри дека агенцијата минатата недела потрошила 59 милиони долари за сместување на илегални мигранти во луксузни хотели во Њујорк.

Администрацијата на Трамп оваа недела исто така укина речиси 1 милијарда долари – односно 900 милиони – договори во Министерството за образование.

Други агенции и оддели се подготвуваат за нови кратења, додека Маск продолжува со својата безмилосна политика на намалување на владините трошоци во име на заштеда на парите на даночните обврзници и елиминирање на „непотребни“ трошења.

Под водство на Маск, DOGE ја презеде задачата да ја испита целата федерална влада за да идентификува области каде што можат да се направат кратења за да се намали финансискиот товар и да се спречи, според администрацијата, „неоправдано трошење“.