Илон Маск штотуку даде идеја како да си го средиме македонското судство

Илон Маск повика на отповикување на американски федерален судија, откако судијата ја блокираше неговата владина агенција од пристап до платните системи на Министерството за финансии.

Најбогатиот човек на светот беше бесен поради одлуката на Окружниот судија Пол Енгелмајер, кој му нареди на Министерството за финансии да не дозволува пристап на никого „освен државните службеници кои имаат потреба од тоа за извршување на своите работни задачи“. Со оваа одлука, специјалните владини службеници како Маск и неговиот Оддел за владина ефикасност (DOGE) се исклучени од системот што управува со трилиони долари.

Како одговор на објава од конзервативниот коментатор Глен Бек, Маск напиша: „Корумпиран судија што штити корупција. Треба да биде отповикан ВЕДНАШ!“

Претходно, Маск само одговори „е време“ на објава што прашуваше: „Можеме ли сериозно да разговараме за отповикување на некои од овие судии?“

DOGE беше основан за да открива и елиминира она што администрацијата на Трамп го смета за непотребно трошење на државни пари. Пристапот на DOGE до финансиските записи на Министерството за финансии, како и истрагите во разни владини агенции, предизвикаа жестоки реакции.

Критичарите предупредуваат дека Маск добива преголема моќ, додека поддржувачите го поздравуваат обидот за намалување на трошењата во владата.

Администрацијата на Трамп првично договорила пристап само за двајца членови на DOGE, но пресудата на Енгелмајер воведе уште построги ограничувања.

Судијата, назначен од поранешниот претседател Барак Обама, во одлуката наведе дека сите кои сега се блокирани од системот мора да ги уништат сите преземени материјали.

„Постои ризик дека новата политика може да доведе до откривање на доверливи информации, како и зголемен ризик системите да станат поподложни на хакирање“, образложи судијата.

Оваа одлука е привремена и ќе важи до петок наредната недела, кога ќе се одржи рочиште на кое ќе се одлучи дали забраната ќе биде продолжена.

Па дали треба да почнеме со отповикување на судии и кај нас?