Кавадарчанец ѝ ветил странски пасош за 400 евра на Кумановка, па ѝ зел 9.000
32-годишен жител на Кавадарци е осомничен дека измамил 50-годишна жена од Куманово за вкупно 9.000 евра, убедувајќи ја дека ќе ѝ посредува за добивање странски пасош.
Како што соопшти Министерството за внатрешни работи, М.Д. бил лишен од слобода на 23 јули околу 13:50 часот на Градскиот плоштад во Кавадарци, во акција спроведена од полициски службеници од ОВР Кавадарци во соработка со СВР Куманово.
Од 400 евра до 9.000
Според пријавата, осомничениот првично побарал 400 евра, тврдејќи дека ќе посредува за добивање странски пасош. Но, по првата уплата, почнал да бара дополнителни суми под различни изговори.
Жената, верувајќи дека постапката е во тек, во повеќе наврати му предала пари, при што вкупната сума достигнала 9.000 евра. И покрај тоа, осомничениот продолжил да бара уште пари.
Уапсен со обележани банкноти
Полицијата презела координирана акција, при што кај осомничениот биле пронајдени 2.000 евра кои претходно биле криминалистички и технички обработени, со цел да се документира примопредавањето.
По приведувањето, тој бил задржан во полициска станица, а потоа изведен пред јавен обвинител, каде што, според информациите од полицијата, го признал делото.
Ќе следува кривична пријава
По целосното документирање на случајот, против 32-годишникот ќе биде поднесена кривична пријава за кривично дело „измама“ по член 247 став 1 од Кривичниот законик.
Од МВР повторно апелираат граѓаните да бидат внимателни кога некој им ветува посредување за добивање документи, вработувања или други услуги во замена за пари, особено кога се бараат дополнителни уплати без официјална постапка.
Коментирај анонимно