Македонецот кој ja освојува Австралија со бурек: Марк Делевски и неговата пекара во Сиднеј
Во некои делови на светот, бурекот не е само храна. Тоа е ритуал, идентитет и причина луѓето да патуваат низ цел град само за да добијат вистинско парче. Во Ливерпул, предградие на Сиднеј, токму тоа го прави Supreme Bakery, пекара во рацете на Марко Делевски, роден Македонец кој пред девет години го презел семејниот бизнис и одлучил да го направи нешто поголемо.
Содржина:
Четири слоеви, свежа рикота и бурекот без компромис го одликуваат Supreme Bakery во Сиднеј
Делевски не прави бурек на половина. „Јас ги правам колку е можно поголеми”, вели тој. Таму каде другите штедат на слоеви, тој прави четири. Таму каде другите додаваат масло, тој го намалува, за да можат и оние кои не сакаат премногу масна храна да уживаат. Но она по кое Supreme Bakery е познато низ цел Сиднеј и Њукасл е рикотата. „Квалитетот на рикотата е најважна работа”, вели Делевски. Неговиот добавувач, Monte Fresco Cheese во Wetherill Park, прави свежа рикота секој ден. Луѓето од целиот регион нарачуваат бурек со рикота и фета, а пекарата ги испраќа до секого. Менито ги следи потребите на заедницата: македонска, српска и хрватска. За постите, наместо сирење и месо, нудат бурек со компир, тиква и кисела цреша.
Лепиња, ќебапи и традиционален вкус кој не се заборава во Supreme Bakery
Покрај бурекот, Supreme Bakery е една од ретките места во Австралија каде можеш да добиеш вистинска лепиња. „Кога некој ќе прави скара со ќебапи, ќе сака мека лепиња”, вели Делевски. „Ја сечеш, ставаш кромид и ајвар, и тоа е прилично традиционално јадење од нашите краишта.” Тој потенцира дека рецептите не се само негови. Со годините, разни мајстори од Македонија, Србија и Албанија работеле во пекарата и секој донел свое знаење. „Секој додава свој мал белег”, вели тој.
Од Ливерпул до Ди Вај: Бурекот на Делевски стигна до нови локации и поддржува хуманитарни цели
Пекарата веќе нема само една локација. Делевски неодамна отворил нов огранок во Ди Вај, северно предградие на Сиднеј, под името The Burek Guy. Партнерство со европскиот супермаркет PB Euromart му овозможило да стигне до заедница која барала бурек, но немала каде да го најде. „Едноставно се обидуваме колку што можеме да запознаеме повеќе луѓе со бурекот”, вели тој. Покрај тоа, за секој продаден бурек, пекарата донира дел од приходот во B1G1, непрофитна организација со над 2.600 деловни членки ширум светот која поддржува различни хуманитарни цели. Бурекот поминал долг пат од Отоманската Империја до предградијата на Сиднеј. Но вкусот, изгледа, не му е потребен пасош.
Коментирај анонимно