Малолетник од Тетово го запалил македонското знаме и го објавил видеото на ТикТок: Полицијата го расчисти случајот

Случајот бил откриен на 22 септември, при редовно следење на социјалните мрежи. По преземените мерки од СВР Тетово и надлежните служби за компјутерски криминал, веќе следниот ден бил утврден идентитетот на малолетникот.

Во присуство на родител и претставници од Центарот за социјална работа, детето признало дека учествувало во настанот. Со согласност на родителот, полицијата го обезбедила и телефонот од кој било објавено видеото.

При разговорот биле посочени уште тројца малолетници кои наводно биле вклучени во палењето на знамето. Полицијата ќе изврши разговори и со нив за да ги утврди сите околности.

По завршувањето на истрагата, МВР ќе достави соодветен поднесок до Основното јавно обвинителство во Тетово, а понатамошната постапка ќе се води согласно законските одредби за деца.