Најсеопфатна анализа досега ги предупредува веганите: Исхраната со месо, јајца и млеко е поздрава од храната на растителна основа

Веганските диети се „помалку здрави“ отколку да вклучите месо, јајца и млеко во вашите оброци. Извештајот на Организацијата за храна и земјоделство на Обединетите нации (ФАО), кој разгледа повеќе од 500 студии, заклучи дека животинските извори на храна нудат „клучни извори на многу потребните хранливи материи“. Тие вклучуваат протеини, масти и јаглехидрати, како и железо, калциум и цинк, кои се од витално значење за здравјето и развојот.

Сепак, овие макро и микро хранливи материи тешко се наоѓаат „во потребниот квалитет и квантитет“ доколку се придржувате до веганска исхрана, според ФАО.

Месото, јајцата и млекото се особено важни за децата, младите и постарите луѓе, како и бремените и доилките.

За да ги процени придобивките од ризиците од консумирање животински производи, ФАО разгледа повеќе од 500 научни трудови и 250 документи за политики. Тоа ја прави студијата најсеопфатна досега.

„Храната од животинско потекло обезбедува енергија и многу есенцијални хранливи материи, како што се протеини, масни киселини и неколку витамини и минерали кои се поретки во другите видови храна“, напишаа заменик-генералниот директор на ФАО Марија Хелена Семедо и главниот економист Максимо Тореро Кулен.

Истакнаа дека „месото“ од растително потекло, достапно во сите големи супермаркети, не може да ги замени животинските производи, има недостиг од некои основни хранливи материи и е богато со масти, натриум и шеќер.

Доказите сугерираат дека кај возрасните, консумирањето јогурт и млеко го намалува ризикот од смрт од сите причини, висок крвен притисок, мозочен удар, дијабетес тип 2, колоректален карцином и рак на дојка и остеопороза, се наведува во извештајот. Извештајот, исто така, покажа дека има релативно цврсти докази дека консумирањето јајца не го зголемува ризикот од мозочен удар или срцеви заболувања. Во меѓувреме, конзумирањето млеко и млечни производи за време на бременоста промовира здрава родилна тежина на бебето, покажуваат доказите.

Утврдено е дека консумирањето говедско месо ги подобрува когнитивните резултати и штити од недостаток на железо – што може да предизвика вртоглавица, замор, главоболки, неправилно чукање на срцето и бледа кожа. Во извештајот се наведува дека јадењето 72 грама говедско месо секој ден е безбедно.

Сепак, авторите напишаа дека дури и конзумирање на мали количини на преработено месо – како сувомеснати производи, сланина и колбаси – треба да се избегнува. Светската здравствена организација вели дека постојат силни докази дека преработеното месо го зголемува ризикот од рак на дебелото црево и желудникот.