Научниците создадоа материјал кој станува уште поцврст откако ќе го допрете. За што сѐ може да служи?

Универзитетот во Калифорнија, Мерцед, направи чекор напред во развојот на електронските уреди за носење и сензори, со создавање на материјал кој станува поцврст кога е допрен или истегнат. Ова го пренесува „Science Alert“.
Овој нов материјал покажува „адаптивна издржливост“, што го прави отпорен на оштетување. Истражувачите вклучиле различни полимери во материјалот, вклучително и конјугирани полимери кои се електрично спроводливи и еластични.

Кога брзо се удира, материјалот се деформира или се протега за да ја апсорбира силата на ударот. Колку е побрз ударот, толку материјалот станува посилен. Додавањето на дополнителни спроводливи полимери дополнително ја подобрува неговата јачина и електричната спроводливост.

Оваа уникатна структура на материјалот, која потсетува на минијатурни ќофтиња во чинија со шпагети, му овозможува да издржи силни удари без да се оштети. Понатамошните експерименти покажаа дека додавањето на позитивно наелектризирани наночестички дополнително ја зголемува јачината на материјалот.

Потенцијалните примени на овој иновативен материјал се многубројни.
„Овој нов материјал отвора голем број можности и ние сме возбудени кога ќе видиме каде ќе не однесе“, рече научникот за материјали Јуе Ванг.

Истражувањето беше претставено на пролетниот состанок на Американското хемиско друштво во 2024 година и го демонстрира потенцијалот на новите материјали за унапредување на технологијата и подобрување на нашите животи.