Нова надеж за болните од рак: Научниците открија „прекинувач“ што може клетките на ракот да ги претвори назад во нормални

Научници открија „прекинувач“ што ги враќа канцерогените клетки во здрава состојба, што се смета за голем пробив во медицината.

Истражувачите во Јужна Кореја успеале да ги вратат заболените клетки во порана, поздрава фаза со активирање на специфичен молекуларен механизам. На овој начин, тие го искористиле критичниот момент пред нормалните клетки неповратно да се претворат во канцерогени и успеале да го запрат развојот на болеста.

„Ова откритие нуди нов пристап во третманот на ракот, со пренасочување на канцерогените клетки наместо нивно уништување“, изјави д-р Тифани Тросо-Сандовал, пензиониран онколог од Меморијалниот центар Слоан Кетеринг, која не била дел од истражувањето.

Таа го спореди овој процес со водата што врие на точно 100°C: „Постои краток момент кога водата не е ниту целосно течна, ниту целосно пареа – слично на тоа, ракот има кус период во кој клетките сè уште содржат здрави и болни карактеристики“.

Традиционалните третмани за рак – хирургија, хемотерапија и зрачење – се фокусираат на отстранување или уништување на канцерогените клетки. Но, оваа нова студија покажува дека постои и трет начин – враќање на клетките во нивната здрава состојба.

Според д-р Тросо-Сандовал, ова откритие може да доведе до помалку токсични терапии од хемотерапијата и зрачењето, кои го оштетуваат целиот организам, а не само канцерогените клетки.

Овие традиционални методи често предизвикуваат сериозни несакани ефекти и можат да доведат до развој на нови болести, па дури и дополнителни видови рак.

Дополнително, ова истражување може да помогне во спречување на тумори кај луѓе со висок ризик – како оние со наследна предиспозиција или оние што се изложени на канцерогени супстанции, како што е чадот од цигари.

Коавторот на истражувањето, професорот Кванг-Хјун Чо од Корејскиот институт за наука и технологија, изјави:

„Оваа студија, на генетско ниво, открива какви промени се случуваат во клетките за време на развојот на ракот – процес што досега беше мистерија. Првпат докажавме дека токму во овој критичен момент на промена се крие важен клуч што може да го врати развојот на туморот наназад“, додаде тој.

Развојот на ракот не е моментален процес – тој настанува постепено, додека штетните промени во ДНК на здравите клетки се натрупуваат со текот на времето.

Откако ќе се случат доволно такви промени, здравите клетки стануваат канцерогени и почнуваат да функционираат абнормално.

Научниците успеале да идентификуваат клучен преоден период во кој клетките истовремено имаат здрави и болни карактеристики.

Со помош на молекуларна технологија, тимот ги таргетирал механизмите што управуваат со оваа промена и пронашол начини да ги насочи клетките повторно кон нивната здрава состојба.

Чо и неговите колеги го тестирале овој механизам во лабораториски услови, користејќи органоиди – минијатурни тумори создадени од клетки на рак на дебело црево.

Тие откриле дека одреден ензим го спречува разградувањето на клучни протеини поврзани со ракот, со што им овозможува на туморите да растат.

Кога научниците го блокирале овој ензим, минијатурните тумори престанале да растат и клетките се вратиле во нормална, здрава состојба.

Резултатите од студијата се објавени во списанието Advanced Science.

Иако концептот на промена на клеточната состојба не е нов, механизмот што го откри тимот на Чо и неговата примена во третманот на рак претставуваат револуционерно откритие, заклучува д-р Тросо-Сандовал.