Помалку шеќер во првите две години од животот значи помал ризик од смрт и половина век подоцна
Шеќерот одамна е предмет на научни расправи, особено кога станува збор за најраниот развој на човечкиот организам. За да се разбере неговото влијание, научниците имале потреба од голем број деца кои во најраната возраст не консумирале шеќер. Таков експеримент денес би бил речиси невозможен од етички причини, но историјата оставила редок природен пример во Велика Британија, каде што поради воениот недостиг една генерација растела со строго ограничен пристап до рафиниран шеќер.
Содржина:
- 65 илјади Британци родени меѓу 1951 и 1953 година станаа клучот на студијата
- Децата до две години немале право на рафиниран шеќер
- На 55 години тие јаделе по 4,14 грама шеќер помалку дневно
- Смртноста била пониска за 19 отсто кај луѓето што растеле без шеќер како бебиња
- Органите изгледале биолошки помлади за 1,0 до 1,2 години
65 илјади Британци родени меѓу 1951 и 1953 година станаа клучот на студијата
Истражувањето објавено во научниот весник „Nature Communications“ ги анализираше податоците на луѓе родени во период кога во земјата сè уште важел системот на купони за храна. Од 1940 до септември 1953 година, британската влада поради воениот дефицит вовела строги правила за исхраната, а количините шеќер и благи производи биле прецизно нормирани.
Децата до две години немале право на рафиниран шеќер
Токму ова ограничување создало услови што научниците подоцна можеле да ги споредат. Бебињата и малите деца растеле без додаден рафиниран шеќер во првите 24 месеци од животот. Кога купоните биле укинати во есента 1953 година, потрошувачката на шеќер нагло пораснала за 50 отсто за само неколку месеци.
На 55 години тие јаделе по 4,14 грама шеќер помалку дневно
Научниците ја искористиле оваа историска околност за да споредат иста популација, израсната во речиси идентични услови, но со различна исхрана во најраниот период од животот. Кога ги испитале истите луѓе во средната животна доба, се покажало дека оние што како мали не добивале шеќер подоцна имале и пониски нивоа на глукоза во крвта.
Смртноста била пониска за 19 отсто кај луѓето што растеле без шеќер како бебиња
Кога резултатите биле стандардизирани според возраста и социо-економските фактори, разликата станала уште појасна. Кај групата што во првите две години од животот била лишена од шеќер, ризикот од смртност бил значително помал во споредба со луѓето што консумирале шеќер како бебиња. Според авторите на анализата, ова претставува исклучително голема разлика.
Органите изгледале биолошки помлади за 1,0 до 1,2 години
Биолошките тестови покажале дека ткивата на главните органи кај луѓето отгледани без шеќер во бебешка возраст имале помлада биолошка старост во споредба со другата група. Заклучокот е јасен: пристапот до шеќер во само првите две години од животот може да остави трага врз здравјето и ризикот од смртност дури и по цели педесет години.
Коментирај анонимно