Понекогаш е подобро да си молчиш: Објавувањето на лажни информации и говор на омраза во Германија e кривично дело, а казната може да вклучува и затвор

Потпретседателот на САД Џеј Ди Ванс продолжи со својата одбрана на слободата на говор во понеделникот, критикувајќи ги германските обвинители за нивните напори да го ограничат говорот во Германија.

CBS во неделата емитуваше репортажа во емисијата 60 Minutes, во која германската влада беше прикажана во позитивно светло за нејзините напори против таканаречениот „говор на омраза“. Германските обвинители објаснија дека граѓаните често се изненадени кога се апсат за објавување навредлива содржина на интернет, но нагласија дека тоа е неопходно.

Но, Ванс не се согласи.

„Навредата не е кривично дело, а криминализирањето на говорот ќе создаде вистински тензии во односите меѓу Европа и САД“, изјави потпретседателот.

Германските обвинители појаснија дека секој што споделува или повторно објавува навредлива содржина или говор на омраза ќе биде гонет, казнет, ќе му биде одземен телефонот, а во одредени случаи и затворен.

Во последниве години, Германија значително ги засили мерките за контрола на говорот на интернет.

CBS во прилогот вклучи и изјава од Џозефин Балон, извршна директорка на HateAid, која ја поддржува засилената контрола врз говорот на интернет.

„Слободата на говорот мора да има граници, а во Германија тие граници се дел од нашиот устав“, истакна таа. „Без граници, мала група луѓе може неограничено да зборува што сака, додека сите други се исплашени и заплашени“.

Ванс исто така реагираше на видео од емисијата Face the Nation на CBS, каде што водителката Маргарет Бренан во интервју со државниот секретар Марко Рубио сугерираше дека лабавите закони за слобода на говор во Германија довеле до Холокаустот.

Ставот на Ванс за ова прашање го одразуваше и неговиот говор на Минхенската безбедносна конференција во петокот, каде ги критикуваше европските лидери за нивните обиди да ја цензурираат јавноста на интернет.

„Стравувам дека слободата на говор е во повлекување“, предупреди тој, истакнувајќи неколку случаи каде што европските влади апселе граѓани поради објави на интернет.