Сè се тресе и паѓа, а тие не го оставаат пациентот: Драматична снимка од операција за време на земјотрес во Јапонија

Неверојатна снимка од болница во јапонската префектура Кумамото покажува како медицински персонал реагирал во моментите кога силниот земјотрес на 28 јули ја затресол операционата сала – додека пациент се наоѓал на операционата маса.

На видеото од надзорните камери се гледа како целата просторија почнува силно да се ниша, медицинската опрема се поместува, а предмети паѓаат на подот. Наместо да се оддалечат, членовите на медицинскиот тим веднаш се собираат околу пациентот и со сопствените тела и раце се обидуваат да го заштитат и да ја задржат операционата маса на место.

Според информациите објавени за снимката, во моментот кога удрил земјотресот во болницата се изведувале четири хируршки интервенции. И покрај силното тресење и хаосот што настанал, сите операции биле успешно завршени.

Земјотресот го погоди Кумамото, на југозападниот јапонски остров Кјушу, на 28 јули. Првичните проценки ја наведуваа неговата магнитуда како 7,1, но американскиот Геолошки завод подоцна ја ревидираше на 6,8. Потресот предизвика сериозни оштетувања, прекини во снабдувањето со електрична енергија и проблеми во транспортот, а по него следуваа десетици афтершокови.

Снимката од болницата во меѓувреме привлече големо внимание на социјалните мрежи, особено поради реакцијата на медицинскиот персонал кој, и покрај силното тресење, остана покрај пациентот.

Доколку сакате добра акција или пак забегани и жестоки случки само за најхрабрите читатели, тогаш посетете го каналот Жестоко. Предупредување: Содржините може да ве вознемират!