Сопственик на бизнис со магариња предизвика дебата затоа што ги мери децата пред да им дозволи да јаваат – „Некои се премногу дебели“ – вели тој

Џон Натал, сопственик на бизнис со магариња за јавање на плажа во Линколншир, предизвика контроверзии откако започна да ги мери децата пред да им дозволи да јаваат. Загрижен за растечките стапки на дебелина кај младите, фирмата на Натал бара од децата да застанат на вага за да се осигураат дека не го надминуваат лимитот од 38 килограми, за да ги заштити магарињата од потенцијална штета.

Натал, чие семејство оперира со магариња за јавање веќе повеќе од 100 години, објаснува: „Ги воведовме вагите затоа што забележавме дека децата стануваат се поголеми. Ако се премногу тешки, се премногу тешки – и тоа е тоа. Магарињата се подобро заштитени и нема да се изморуваат. Го направив тоа за да ги заштитам моите животни.“

На таблата што ја направил Натал пишува дека јавањето е дозволено само за деца под десет години, пониски од 1.4 метри и кои го исполнуваат тежинскиот лимит пред да можат да платат 5 евра за јавање на магарињата. Тој вели: „Сè си пишува на таблата на влезот – висината, знаците, вагите, и можете да ги видите родителите како ги проверуваат своите деца“

Според податоците нивото на дебелина кај децата на возраст од четири до пет години во Англија минатата година беше 9.2%, додека кај децата на возраст од десет до единаесет години беше 22.7%.

Катарина Џенер, директорка на Алијансата за здравје и дебелина, ја критикува оваа пракса: „Целосно е неприфатливо да се мери дете во јавност и потоа да му се каже дека не може да се вози. Околината која ги опкружува децата, вклучувајќи ја и нездравата храна и пијалаци, е виновна за високите нивоа на дебелина.“

Натал, татко на четири деца, ги припишува високите стапки на дебелина на недостатокот на физичка активност и присуството на брза храна: „Мислам дека многу од тоа е поврзано со интернетот и слични работи. Тие не мора да излегуваат надвор и да шутираат топка; можат лесно да играат на компјутер. Моите деца секогаш беа активни. Сите мои деца секогаш правеа нешто, и сега сè уште трчаат маратони.“

И покрај критиките, Натал стои зад својата одлука: „На крајот на денот, тие се мои магариња. Благосостојбата на животните мора да биде на прво место. Некои деца се едноставно премногу големи за да јаваат магаре. Моите магариња веќе работат доволно напорно за мене.“