Трамп: Пу, пу, не важи.. Пак може да купувате од Тему

Кина останува во фокусот на трговските политики на САД, откако претседателот Доналд Трамп привремено ги одложи новите царини за евтините производи од кинеските платформи како Shein и Temu. Извршната наредба, потпишана во среда, предвидува одложување на тарифите сè додека Министерството за трговија не воспостави процедури за нивно обработување и наплата.

Оваа промена доаѓа откако американските потрошувачи почнаа да чувствуваат последици од новите правила за увоз од Кина, кои стапија во сила во вторникот. Брзото спроведување на мерките предизвика хаос во поштенските услуги, при што Поштата на САД привремено престана да прифаќа пакети од Кина и Хонг Конг, а повеќе од милион пакети се натрупаа на аеродромот ЏФК во Њујорк.

Новите трговски политики ставија крај на „de minimis“ правилото, стар трговски закон кој овозможуваше пакети со вредност под 800 долари да влегуваат во САД без царини, под услов да се испраќаат директно до потрошувачите. Ова правило беше клучна предност за платформи како Shein и Temu, кои избегнуваа царински давачки испраќајќи производи директно од Кина. Со неговото укинување, цените на овие производи се очекува да се зголемат, што веќе е забележливо кај некои потрошувачи.

Промената не само што ќе ги поскапи производите како облека, мебел и чевли, туку ќе има влијание и врз пошироки категории, вклучувајќи електроника. САД во 2023 година увезоа електронски производи од Кина во вредност од 146 милијарди долари, а компании како Apple и Dell произведуваат значителен дел од своите уреди таму. Лаптопи, таблети, конзоли за игри, смартфони и телевизори најверојатно ќе бидат меѓу производите чии цени ќе пораснат во наредните недели.

Трамп ја оправдува политиката на нови тарифи со намерата да ја казни Кина за недоволни напори во спречување на нелегалната миграција и трговијата со фентанил. Канада и Мексико беа поштедени од царинските давачки на 30 дена, откако се согласија да го зголемат военото присуство на границите за да ја намалат трговијата со дрога и нелегалната миграција. Доколку овие договори не се одржат, Трамп би можел повторно да ги воведе царините, што би значело дополнителни поскапувања за американските потрошувачи, вклучувајќи производи како сурова нафта, бензин, возила, алкохол и земјоделски производи.