Вистински уникат: Астрономите открија „невозможна“ џуџеста галаксија, која речиси и да не мрда воопшто

Тим од научници откри изолирана џуџеста галаксија наречена PEARLSDG, која ги оспорува постоечките теории за формирање на галаксија. Ова откритие беше објавено во „The Astrophysical Journal Letters“.
Џуџестите галаксии обично имаат високо ниво на активност на формирање ѕвезди, но PEARLSDG се покажа како исклучок од правилото. Астрономите беа изненадени што оваа галаксија мирува и не формира нови ѕвезди.

„Овие типови на изолирани мирни џуџести галаксии всушност не биле забележани претходно, освен во релативно ретки случаи. Тие всушност не се очекува да постојат со оглед на нашето сегашно разбирање за еволуцијата на галаксиите, така што фактот што го гледаме овој објект ни помага да ги подобриме нашите теории за формирање на галаксии“, вели водечкиот автор професор Тим Карлтон од Државниот универзитет во Аризона.
Откритието на PEARLSDG го потврдува постоењето на празнини во нашето сегашно знаење за Универзумот. Според постоечките теории, галаксиите треба да се формираат на одредени начини и да покажат одредено ниво на активност со текот на времето. Сепак, присуството на галаксија која не одговара на овие претпоставки укажува дека нашите теории можеби се нецелосни или недоволно точни.

PEARLSDG се изучува од проектот „Prime Extragalactic Areas for Reionization and Lensing Science“ (PEARLS) со помош на вселенскиот телескоп JWST. Галаксијата PEARLSDG се разликува од обичните галаксии како што е Млечниот пат поради малиот број на ѕвезди. Нашата галаксија содржи околу 200 милијарди ѕвезди, но PEARLSDG содржи помалку од 100 милиони.

Истражувачите користеле JWST за да го проучуваат PEARLSDG и да го одредат неговото растојание. Откриле дека галаксијата е оддалечена само 98 милиони светлосни години од Земјата. Набљудувањата покажаа дека многу малку настани се случуваат во PEARLSDG и не беа пронајдени докази за активно формирање на ѕвезди. Тимот исто така не најде докази за млади ѕвезди.

Една од важните точки на студијата беше мерењето на движењето на галаксијата, што покажа дека не е под влијание на ниту еден друг објект во близина. Ова потврдува дека PEARLSDG е навистина изолирана џуџеста галаксија.

„Ова беше целосно спротивно на она што луѓето би го очекувале за таква џуџеста галаксија“, додаде д-р Карлтон.