Заканувачка порака на Трамп до Хамас: „Вие сте МРТВИ! Му испраќам на Израел се што му треба за да ја заврши работата во Газа“

Заканите на Трамп кон Хамас

„‘Shalom Hamas’ значи Здраво и Довидување – вие избирате“, напиша Трамп на неговата платформа Truth Social.
„Ослободете ги сите заложници веднаш, не подоцна, и веднаш вратете ги телата на убиените, или за вас е КРАЈ! Само болни и изопачени луѓе ги задржуваат телата на мртвите – а вие сте болни и изопачени! Му испраќам на Израел сѐ што му треба за да ја заврши работата – ниту еден член на Хамас нема да биде безбеден ако не направите како што ви кажувам!“

Исто така ѝ порача на раководството на Хамас да ја напушти Газа „додека сѐ уште имаат шанса“.

„До народот на Газа: Ве чека убава иднина, но не ако држите заложници. Ако тоа го правите – ВИЕ СТЕ МРТВИ! Направете ПАМЕТЕН избор! ОСЛОБОДЕТЕ ГИ ЗАЛОЖНИЦИТЕ ВЕДНАШ, ИНАЧЕ ПОДОЦНА ЌЕ ГО ПЛАТИТЕ СКАПО!“

Тајни преговори на Белата куќа со Хамас

Овие закани на Трамп доаѓаат само неколку часа откако беше објавено дека американската влада води тајни разговори со Хамас за ослободување на заложниците.

Портпаролката на Белата куќа, Каролин Левит, потврди дека специјалниот пратеник за заложници, Адам Белер, има овластување да преговара со кого било, вклучително и со Хамас. Разговорите се воделе во Доха, но не директно меѓу американските и израелските преговарачи и Хамас, туку преку арапски посредници.

Кога беше прашана дали разговорите имаат врска со контроверзниот план на Трамп за преземање и обновување на Газа – наречен „Газа-лаго“ – Левит одби да даде детали, велејќи дека „ова се тековни разговори“.

Реакцијата на Хамас

Хамас реагираше на заканите на Трамп преку портпаролот Сами Абу Зухри, кој изјави дека „јазикот на закани нема никаква вредност“ и само ги усложнува преговорите.

„Трамп мора да запомни дека постои договор што мора да го почитуваат двете страни – тоа е единствениот начин да се вратат затворениците“, изјави Зухри.

Неколку дена по првите закани на Трамп, Хамас ослободи тројца заложници, вклучувајќи го и Американецот-Израелец Сагуи Декел-Чен (36).

Се верува дека последниот жив американски заложник е Едан Александар од Њу Џерси, кој беше прикажан во пропагандно видео на Хамас во ноември 2024 година. Израел вели дека 24 заложници сѐ уште се живи, додека телата на 35 убиени се задржани во Газа.

Дополнителна воена помош за Израел

Заканите на Трамп доаѓаат само неколку дена по одлуката на државниот секретар Марко Рубио да испрати дополнителни 4 милијарди долари воена помош за Израел.
Трамп, исто така, се сретна со ослободените заложници, меѓу кои беа Иаир Хорн, Омер Шем Тов, Ели Шараби, Кит Сигел, Авива Сигел, Наама Леви, Дорон Штајнбрехер и Ноа Аргаман.
„Претседателот Трамп внимателно ги сослуша нивните потресни приказни, а заложниците му се заблагодарија за неговите напори да ги врати дома сите заложници“, изјави Левит.

На 25 февруари, Трамп објави видео на Truth Social со наслов „Газа 2025: Што следува?“

Видео-клипот, создаден со вештачка интелигенција, прикажува гламурозна визија на Газа како туристичка дестинација со хотел „Трамп“, огромна златна статуа на Трамп и луксузни летувалишта.
На снимката се појавува и Илон Маск како фрла пари на посетителите, додека Трамп танцува со ориентална танчерка и пие коктели со Нетанјаху.
Видеото предизвика жестоки реакции на социјалните мрежи, при што корисници на X го нарекоа „апсолутно застрашувачко“ и „срам за целиот свет“.