Зошто Илон Маск сака да ја уништи Меѓународната вселенска станица на НАСА вредна над 130 милијарди евра „што е можно поскоро“?

Илон Маск изјави дека Меѓународната вселенска станица (ISS) „ја исполни својата цел“ и објасни зошто сака да ја повлече од употреба пред предвидената временска рамка за 2030 година.

ISS се користи од 1998 година, а за неа заеднички се грижат НАСА, руската вселенска агенција „Роскосмос“, Канадската вселенска агенција, Јапонската агенција за истражување на вселената и Европската вселенска агенција. Сепак, нејзиниот животен век е ограничен поради истрошеноста на примарната структура.

„НАСА ги испитуваше неколкуте опции за деактивирање на Меѓународната вселенска станица, вклучувајќи расклопување и враќање на Земјата, подигнување во повисока орбита, природно пропаѓање со случајно повторно влегување или контролирано насочено повторно влегување во оддалечен океански регион“, објасни НАСА.

Сите агенции, освен Русија, се обврзаа да ја одржуваат станицата до 2030 година, додека Русија, предводена од Владимир Путин, се обврза само до 2028 година.

„Безбедното враќање на Меѓународната вселенска станица е одговорност на сите пет вселенски агенции“, истакна НАСА претходно.

Маск, чија компанија SpaceX е задолжена за изградба на возило за безбедно симнување на станицата од орбитата, предлага ISS да се повлече до 2026 година.

Извршниот директор на SpaceX, кој има 53 години, се надева дека ќе започне со колонизација на Марс од 2050 година, па смета дека ISS повеќе не е неопходна.

„Време е да започнеме со подготовките за повлекување на [ISS]. Таа ја исполни својата мисија. Има многу малку дополнителна корист. Ајде да одиме на Марс“, напиша Маск на платформата X (поранешен Twitter).

Кога еден следбеник го праша кога би сакал да започне процесот на симнување на станицата, тој одговори: „Одлуката е на Претседателот, но мојата препорака е што е можно побрзо. Препорачувам за 2 години од сега.“

Ова доаѓа откако минатата година на ISS беа откриени 50 „области на загриженост“.

Американската и руската вселенска агенција се свесни за истекувањата на воздух на станицата, кои се присутни од 2019 година.

НАСА изјави за „Вашингтон Пост“ дека Роскосмос користел „комбинација од завртки и лепенки“ за да ги покрие пукнатините.

„Го нагласивме значењето на истекувањата повеќе пати, вклучително и кога бев во Русија оваа година“, изјави Џим Фри, заменик администратор на НАСА.

Како привремена мерка, им наложиле на астронаутите да го држат затворен отворот што е можно повеќе, особено навечер.

„Ги замоливме да го минимизираат времето кога отворот е отворен, и тие го минимизираат. Дојдовме до компромис да го затвораат навечер.“, додаде Фри.

И покрај проблемите, НАСА верува дека станицата сè уште е доволно безбедна за работа. Но, сепак, стапката на истекување на воздух останува „меѓу 0,9 до 1,1 кг воздух на ден над вообичаената основна вредност на станицата“, соопштија пред неколку месеци.